A Consellería de Educación elimina as prazas do profesorado para a integración da etnia xitana.

Desde o STEG denunciamos a desaparición deste programa importante para a integración deste colectivo polo que esiximos a inmediata recuperación do programa para este curso.

 

No curso pasado existían en Galiza 29 prazas (o número variaba cada curso) de mestras e mestres coa denominación de CEIP Integración Etnia Xitana que eran nomeados co obxectivo de facilitar a integración deste alumnado. O seu cometido ía máis aló que o da atención ao alumnado ao traballar coas familias das nenas e nenos. Podemos dicir que, en liñas xerais, o programa funcionaba ben e cumpría os obxectivos cos que nacera.

Consultados os centros, afirman que o profesorado co que contan este curso é preciso para o desenvolvemento de necesidades académicas ordinarias, entre as que non se contemplarían o apoio específico a este alumnado, tal e como si se viña facendo en cursos anteriores (ao non contar este curso con profesorado nomeado para tales efectos).

A Consellería de educación está a recortar no ensino programas necesarios para o desenvolvemento dun ensino integrador, inclusivo, democrático  e igualitario. O dereito a un ensino en igualdade de condicións é unha obriga da Administración educativa e con esta medida está a diminuír a atención á diversidade e con elo a calidade do sistema público de ensino.

O STEG esixe que a administración dote aos centros do profesorado preciso para cumprir todas as necesidades e que nos centros onde existe alumnado de etnia xitana envíe profesorado específico para este cometido.

Estamos ante outro ataque á calidade do ensino público coa gravidade de que se diminúe a atención a un colectivo que precisa dela.   

SECRETARIADO NACIONAL DO STEG
Galiza,3 de setembro de 2009