ASINADO ACORDO HISTÓRICO SOBRE AGRUPAMENTOS.
As organizacións sindicais asinantes conseguimos que a Consellaría asuma o pactado na Mesa Sectorial.

Estamos ante o mellor acordo asinado para a escola rural de Galiza e, sen dúbida, o mellor acordo do Estado nesta materia.

O STEG felicítase por ter acadado un acordo que supón que a partires de agora vai haber uns criterios claros e homoxéneos para todos os centros de Galiza á hora de facer o agrupamento de alumnado de distintos cursos ou ciclos.

O asinado supón, no rural galego, a non supresión de máis de 150 unidades e a creación de 152 novas, a gran maioría de Educación Infantil. Para o vindeiro curso estará funcionado xa o 50% de ditas unidades e o 50% restante farao ao inicio do curso 2010-2011.

No documento asinado tamén se recollen outras cuestións que supoñen importantes avances:

- o alumnado repetidor por fin contará a hora de establecer as ratios.

- as unidades que conten con alumnado con necesidades educativas específicas poderán ver reducida a ratio. Estes casos negociaranse nas xuntas de persoal.

- a Consellaría asume a obriga de fomentar a formación específica do profesorado que traballe en aulas con alumnado de distintas idades.

- créase unha comisión de seguimento que anualmente vixiará polo cumprimento do acordado.

- revalorización das Xuntas de Persoal na medida en que terán que analizar e negociar a creación e supresión de unidades, supresión das unitarias, tratamento de centros que poidan ser obxecto dun tratamento diferente...

Por todo o dito, entendemos que o acordo supón un gran avance para ensino rural e en conxunto para toda a escola pública galega, que é, e seguirá sendo o único criterio empregado polo STEG á hora de asinar ou non acordos.

Texto integro do acordo