A CONSELLERÍA INCUMPRE O ACORDADO NA MESA SECTORIAL

A Consellería minte e desdícese do acordado na Mesa Sectorial do pasado 22 de xuño na que se chegara a un Acordo satisfactorio en materia de agrupamentos.

O Acordo dedicido o 22 de xuño ía asinarse hoxe (6 de xullo). A posible sinatura do acordo adíase ao venres 10 de xullo.

O STEG felicitárase do Acordo ao que chegara o pasado 22 de xuño coa Consellería en materia de agrupamentos, pois era moi bo para o ensino público en xeral e para a escola rural en particular. A sorpresa chegou no día de hoxe (6 de xullo), data prevista do Acordo pola Consellería e as forzas que o pactáramos (STEG, CCOO, UXT e ANPE). A Consellería, que de novo deu mostras de incompentencia á hora de realizar as tarefas que se derivan dos Acordos que subscribe, sorprendeunos cun texto que non se axustaba ao pactado: pretendían que o Acordo se limitase aos centros afectados por supresións.

Ao STEG a proposta seméllalle inaceptable e incomprensible, o motivo fundamental é que consideramos que o Acordo é de aplicación xeral para todos os centros incompletos de Galiza. O STEG entende que os criterios deben de ser de aplicación universal tal e como pactáramos coa Consellería.

Velaí a razón pola que non aceptamos o texto que nos presentaron para asinar hoxe ningunha das forzas sindicais que o pactáramos. Tampouco aceptamos as razóns dadas: se a Consellería tiña que ter realizado os seus deberes en tempo e forma e acudir á Mesa Sectorial sabendo os recursos dos que dispón para pactar acordos que logo vai incumprir por falta dos recursos necesarios para a súa aplicación. Isto só ten un nome: incompetencia e ineficacia.

Ademais, o STEG aprendeu unha lección para toda a lexislatura: nunca sairemos dunha xuntanza ou Mesa Sectorial na que se acorde algo sen ter subscrito un preacordo coas partes asinantes. Esta Consellería demostrounos que non ten palabra.

Debido á actitude que adoptamos os sindicatos que chegáramos ao Acordo do pasado 22 de xuño, a Consellería comprometeuse a levar un novo texto, para someter a nosa aprobación e sinatura. O STEG actuará, coma sempre, en defensa do ensino público.