O PROGRAMA DE GRATUÍDADE DOS LIBROS DE TEXTO A REVISIÓN
O presidente Feijóo vén de anunciar en sede parlamentaria que o programa de gratuídade de libros de texto en centros públicos e privados-concertados para os niveis obrigatorios e gratuítos, vai ser revisado polo seu goberno; efectivamente, segundo se deduce das súas propias declaracións, nas que non garantía a continuídade do programa que se viña que se viña aplicando dende o ano 2005 –de feito implantouno o seu gran valedor, Manuel Fraga, e asumiuno o bipartito-, “non hai ningunha decisión tomada”, aínda que deseguido apresurouse a “asegurar que todas as rendas baixas e medias van manter a gratuídade dos libros de texto".
Estamos, xa que logo, diante dunha medida populista e demagóxica por dúas razóns, principalmente:
- Anúnciase como unha medida progresista, ao garantir a gratuídade dos libros de texto para as rendas baixas, pero ocúltase que esa medida seguirá sen afectar a outros numerosos materiais curriculares (cada vez máis empregados nas aulas), que seguirán a ser de pago para todas as familias, incluídas as das rendas máis baixas; e
- Obedece ás presións dos grupos editoriais, que precisan renovar o mercado dos libros de texto nestes tempos de redución de beneficios económicos, ao renunciar a dúas medidas que ao longo deste tempo se revelaran como pedagóxicas:
- O valor do libro de texto como un material compartido, polo que debía ser preservado –o mal uso do libro implicaba a obrigatoriedade de pagamento pola familia de quen estragara o libro-; e
- O respecto pola natureza ao reducir o impacto negativo que ten sobre os bosques do planeta a tala masiva para a produción de papel.
A medida, ademais, preséntase no paquete de austeridade do goberno, afirmando que servirá para reducir gastos –ao centrarse nas rendas baixas e eliminar a universalización-, pero ocultan que aumentará os gastos ao realizarse un desembolso anual, non como até agora, cada catro anos.
Esperaremos a ter a nova Orde nas nosas mans para facer unha valoración máis detallada da proposta do goberno conservador que preside Feijóo; esperamos, ademais, poder discutila nunha Mesa Sectorial, onde defenderemos as nosas posturas, as mesmas que defendimos no seu momento:
- A gratuídade dos libros de texto para todo o universo escolarizado en centros públicos, excluíndo deste programa de gratuídade os centros privados-concertados;
- O préstamo do libro de texto ou o seu emprego na aula, como un material educativo que pode usar todo o alumnado, fronte á propiedade individual;
- Por último, a extensión da gratuídade a todos os materiais escolares (fotocopias, material deportivo para EF...), pois entendemos que o ensino debe ser público e gratuíto en todas as súas etapas e modalidades educativas, facendo extensible a gratuídade, tanto aos materiais escolares como aos servizos complementarios, como se recolle nos nosos estatutos.
Os gobernos deberían atender ao ben público; porén, neste caso, o que presentan como unha medida fronte ás necesidades das familias de rendas baixas, non é máis que unha concesión ás editoriais.
Dende o STEG loitaremos por manter un programa de gratuídade pedagóxico, progresista, progresivo e ecolóxico.
Secretariado Nacional do STEG
Galiza, xuño de 2009
