OEP 2008: 2008 PRAZAS

O STEG valora positivamente o incremento de cadros de persoal docente ao mesmo tempo que denuncia que non vaia acompañada dun proceso de estabilidade.

Con esta oferta ponse en perigo o traballo de profesorado con máis de 10 anos de antigüidade ao ofertar, nalgunhas especialidades, praticamente o mesmo número de prazas que de docentes interinos.

O primeiro que debemos salientar é o noso rexeitamento a que se nos presente un documento desta importancia sen poder valoralo previamente. Valoramos positivamente que se presente máis cedo que outros anos e que se permita facer achegas na Mesa Sectorial do vindeiro luns 25. Tamén agardamos que non sexa un mero trámite de carácter formal e que na práctica o documento estea pechado e non sufra variacións.

Para o STEG a cantidade de 2008 prazas é enganosa na medida en que non supón na realidade un aumento de postos de traballo ao ser a maioría prazas cubertas con profesorado interino. Isto vai a perda do posto de traballo de persoas con 10 ou máis anos de servizo para a administración, co que estamos a falar de substitución de traballadoras e traballadores mais que de creación de emprego.

Temos que valorar positivamente o aumento dos cadros de persoal fixos xa que isto redundará na redución da precariedade laboral e na calidade do ensino. Pero entendemos que o proceso de ampliación destes cadros, debe facerse de maneira gradual. Sacar ofertas destas características concentradas nunha oposición, pode traer consecuencias negativas, tanto para o profesorado interino como para o libre. Son moitas as casuísticas que se poden dar e que poden prexudicar a unha persoa, que por diversas razóns non chega ao momento do inicio das oposicións nas mellores condicións. Estes motivos, xunto coa segura diminución de oferta de prazas nos vindeiros anos, fai que se escape unha oportunidade que seguramente non se volverá a repetir.
Pola contra, se repartimos toda a oferta en varios procesos selectivos, repartimos tamén as posibilidades de acceso para todo o mundo, sexa profesorado interino ou libre.

Seguimos a demandar a necesidade dunha OEP acompañada dun proceso de estabilidade que evite a perda de postos de traballo. Ao mesmo tempo que non deixaremos de denunciar este sistema de concurso-oposición que só é un parche transitorio á precariedade laboral, cando non un empeoramento, e que impide o acceso de persoas ben formadas á función pública.

Secretariado Nacional do STEG
febreiro 2008