O STEG, a través
de STES-i, consegue que o Consello Escolar do Estado propoña
melloras ao Decreto de Centros de Referencia Nacional de FP
O Ministerio de Educación e Ciencia (MEC) continúa
desenvolvendo a Lei de Formación Profesional (FP), e agora faino
tramitando o proxecto
de Real Decreto polo que se regulan os centros de referencia nacional
de FP.
O Consello Escolar do Estado (CEE) informou este proxecto
e na súa Comisión Permanente acordou, a proposta de STES-intersindical,
formular ao MEC diversas melloras do proxecto, entre as que destacamos:
- Os cadros do Profesorado destes centros deberán negociarse
cos representantes do Profesorado na Mesa Sectorial de Educación
do territorio no que se sitúe o Centro. Pensamos que o lugar
de negociación dos centros galegos é a mesa sectorial
de Galiza. O proxecto non cita os cadros do Profesorado nin de quen
é a responsabilidade de as concretar, agora, tras esta proposta
de STES, o MEC debe atender a petición do CEE no sentido
de que se negocien cos sindicatos do Profesorado.
- O Profesorado do Centro debe formar parte do Consello Social
do mesmo. O proxecto só contempla a presenza neste Consello
de representantes das administracións e dos “axentes
sociais”, ignorando ao profesorado, agora, coa proposta de
STES, o MEC debería cambiar o proxecto e dar entrada no Consello
de cada Centro ao Profesorado do mesmo.
- O Director ou Directora do Centro debe ser nomeado a proposta
do Consello Social e non electo “a dedo” polo MEC, como
formula o proxecto; esta proposta de STES está en liña
coa defensa da participación e a xestión democrática
que entendemos debe sustentar o sistema educativo.
Pero pese ás propostas de mellora aprobadas
no Consello Escolar do Estado, este proxecto de decreto mantén
unha serie de elementos que desde o STEG rexeitamos, entre os que destacamos
dous:
- A titularidade dos centros poderá ser da Administración
Xeral do Estado ou da Administración autonómica, o
que pode supor un retroceso e/ou intromisión nas competencias
que teñen Galiza e outros territorios en educación
contempladas na Constitución. A isto engádese que
o Estado poderá realizar accións en ditos centros
sen o acordo do territorio onde se sitúen o mesmos.
- No Consello Social do Centro estarán representadas as
organizacións sindicais “máis representativas”
e, coa lexislación actual isto significa que centrais de
ámbito territorial, poderán estar nos Consellos Sociais
de centros de FP doutras comunidades e, porén, centrais representativas
desa comunidade non poderán estalo por non ser “máis
representativas” no ámbito do Estado.
Desde o STEG pedímoslle ao MEC que respecte
neste decreto a configuración territorial do Estado e os dereitos
do profesorado a estar representado polas súas organizacións,
de tal forma que non se provoquen problemas competenciais nin de representatividade.
Secretariado Nacional do STEG
decembro 2007 |