O gasto en educación e a manipulación da patronal dos centros católicos

A afirmación de que “a escola privada concertada lle sae á Administración moito máis barata que a pública”, realizada desde a “Federación Española de Religiosos de la Enseñanza” FERE para reclamar máis diñeiro público para a escola privada, supón unha clara manipulación do servizo que presta cada tipo de escola e das cifras de gasto por alumna/o co único obxectivo de confundir á opinión pública.

A escola pública é o eixe vertebrador dos sistemas educativos estatal e galego . A escola pública é a que está en todas as vilas e cidades e en todos os barrios e aldeas, por pequenas que estas sexan, e á que acode a maioría do alumnado de toda Galiza e do Estado. A escola pública é a que fai da etapa de escolarización obrigatoria unha etapa de convivencia entre escolares, cos iguais e cos distintos; é a escola que contribúe con esta convivencia ao mellor desenvolvemento democrático dunha sociedade que cada día é máis diversa, máis múltiple, máis plural.

Que o gasto por alumna/o é maior nesta escola co gasto nas escolas privadas é un dato que saben todas as persoas que coñecen o mundo do ensino, como tamén saben que a escola concertada é a que está nas grandes cidades, a que selecciona ao seu alumnado pola súa extracción social e polos recursos económicos das súas familias, a que non quere alumnado con problemas…, a que ve o ensino como un negocio ou como un lugar para o adoutrinamento, ou como ambas cousas á vez.

En todo caso, resulta máis preocupante que gobernos, como o galego, incrementen os concertos educativos en tramos non obrigatorios ou manteñan os existentes cando non son necesarios, o que provoca o desvío ( despilfarro) de recursos públicos á mans privadas.

O conxunto das administracións educativas do Estado deben seguir investindo máis na escola pública pois a súa obriga é levar unha educación de calidade a todo o alumnado, independentemente de onde viva.

Secretariado Nacional do STEG
abril 2008