STEG esixe que se manteña e potencie o valor das escolas oficiais de idiomas

STEG, a través de STES-intersindical, reclamará á ministra de Educación que se corrixa de inmediato a depreciación dos ensinos impartidos nas Escolas Oficiais de Idiomas a consecuencia do estabelecido no RD que desenvolve as liñas fixadas na Lei Orgánica de Educación a este respecto. Igualmente, presentarase unha emenda neste sentido ao Consello Escolar do Estado o próximo 20 de maio, cuxo texto acompañamos.

A nova ordenación académica das EOI suscitou xa un descontento unánime que se traduce en distintas campañas informativas e de protesta impulsadas por alumnado e profesorado en distintos territorios do Estado. En suma, trátase de reivindicar que nas Escolas se sigan impartindo os ensinos equivalentes ao nivel C1 do Marco de Referencia Europeo, como viña facéndose ata agora, e non ao B2 como estabelece o decreto, o que supón unha baixada no rango destes ensinos.
O Marco de Referencia Europeo contempla tres niveis de coñecemento e manexo das linguas: o básico (dividido en A1 e A2), o Intermedio (B1 e B2) e o Avanzado (C1 e C2). Ata agora nas EOI impartíanse cinco cursos, o último dos cales correspondía ao nivel avanzado C1. Coa nova normativa, xa en vigor, se dá o paradoxo de que son seis os cursos que é necesario superar –é dicir, un máis- e porén o diploma ao que se accede ao concluír os estudos equivale a un nivel Intermedio B2.

Esta nova realidade choca de cheo co principio inspirador da LOE de combinar calidade con equidade, e de favorecer a aprendizaxe ao longo da vida.
As Escolas Oficiais de Idiomas desempeñan un labor docente, social e cultural de primeira orde, posto que permiten a sectores significativos da cidadanía –a maior parte poboación adulta- acceder ao coñecemento e dominio de linguas estranxeiras, para completar a súa formación, para acceder ao mercado laboral ou por inquedanza cultural. Trátase dunha rede que non ten parangón noutros países europeos e que se labrou, durante todos estes anos, un merecido prestixio.

De se manter esta normativa o Ministerio tirará pola borda este importantísimo patrimonio e de obrigar á cidadanía a completar a súa formación en idiomas nas academias ou centros privados . E é o propio futuro das Escolas o que queda en entredito –porque é normal que descenda a matriculación se tras superar seis cursos nada menos nin sequera se pode obter unha titulación de nivel avanzado-, ou o valor das titulacións que ata agora servían de mérito académico ao profesorado.

Por todo iso, entre as prioridades que o STEG exporá á ministra de Educación, Mercedes Cabreira, no primeiro encontro que se manteña con ela, figurará a esixencia de que a través das EOI se poida acceder ao máximo nivel de dominio lingüístico contemplado no Marco de Referencia Europeo.
Tamén demandaremos en Galiza a inclusión de galego para estranxeiros ao igual que existe para a lingua castelá.

Secretariado Nacional do STEG
maio 2008