ACLARACIÓNS SOBRE COBRO DE TRIENIOS

Con data 19 decembro os medios de comunicación fanse eco dun comunicado do STEG no que se informa da aprobación do pago de trienios ao profesorado interino.

A este comunicado responde CCOO afirmando que o STEG se quere apropiar de conseguir esta mellora cando eles chegaron a un acordo co MEC para o pago ao profesorado interino. Alegrámonos de que CCOO asine un acordo que mellore as condicións sociolaboral do profesorado interino tal e como o STEG ben reclamando desde hai anos. Nós sempre saudaremos calquera mellora que afecte ao profesorado veña de quen veña.

Agora ben, temos que aclarar A TRAMPA INFORMATIVA de CCOO:
O acordo que asinan non é máis que a ratificación dun acordo parlamentario do Congreso dos Deputados do Estado. A reunión da Mesa Xeral da que fala CCOO é posterior á modificación en Cortes do Proxecto de Estatuto Básico do Empregado Público. Dificilmente o Congreso de Deputados pode recoller un acordo que aínda non existía cando tomou a decisión de aprobar as emendas sobre o cobro de trienios para o persoal interino e a xubilación parcial.

Queda claro que CCOO e o MAP non fixeron outra cousa que ratificar un acordo xa conseguido polas forzas parlamentarias. O STEG e a Confederación de STES tíñanse reunido cos grupos parlamentarios para solicitarlles a presentación da emenda.

Para confirmar o que nós dicimos podedes consultar o Boletín Oficial das Cortes de 13 de decembro. Pode verse na páxina: http://www.congreso.es/public_oficiales/L8/CONG/BOCG/A/A_094-11.PDF). Nela vén o Informe do Relatorio elevado á Comisión de Administracións Públicas do Congreso dos Deputados.

Como Anexo a dito informe pode lerse o Proxecto de Lei do Estatuto Básico do Empregado Público modificado coas emendas aprobadas ata o día 12 nesta Comisión Parlamentaria durante o trámite.

En mala posición queda un sindicato que si asinou, o 13 de xuño pasado e ante o Presidente do Goberno, un acordo de proxecto de Estatuto Básico do Empregado Público que tivo que verse mellorado, para o persoal empregado público, en sé parlamentaria. Chegar a acordos, como este do 13 de decembro, con contidos xa publicados en diarios oficiais, di moi pouco do seu perfil como organización con iniciativa e reivindicativa e moito do seu perfil como organización que firma o xa asumido polo poder político.

Non negaremos que o STEG e os sindicatos confederados de STEs-Intersindical non eran as únicas organizacións que apoiaban estas melloras. De feito as peticións e reunións cos grupos parlamentarios, para lograr unha maior posición de forza, realizáronse de forma unitaria con outras organizacións coas que coincidimos, na crítica ao Proxecto de Estatuto, como son ELA ou CIG, ás que nomeamos no noso comunicado de prensa.

Secratariado Nacional do STEG
decembro 2006