Entrevista do STEG coa Conselleira de educación

O xoves 1 de febreiro o STEG mantivo unha reunión na Consellería coa Conselleira Laura Sánchez Piñón e o secretario de educación Benito Fernández. Fomos convocados pola Consellería para explicar cal vai ser a nosa liña de traballo. Polo STEG asistiron tres membros do secretariado nacional : Branca Guerreiro, Gelo Portomeñe e Xosé Cabido.

No inicio da sesión a Conselleira felicitounos polos nosos resultados electorais así como pola nosa web. Despois de explicar brevemente cal fora a nosa liña de traballo nos últimos catro anos, iniciamos unha exposición dunha hora e media sobre aqueles aspectos que consideramos imprescindíbeis para a mellora da Escola Pública Galega. A cantidade e extensión dos temas a tratar provocou que algúns foran só expostos polo STEG sen recibir resposta por parte da administración.

A continuación resumimos cales foron as nosas demandas para a mellora do ensino público galego onde destacamos como máis inmediato o desenvolvemento da LOE no que a currículo e horario se refire, a mellora nas condicións sociolaborais do profesorado con especial atención á estabilidade do profesorado interino, redución do horario de relixión ao mínimo posíbel, avance na galeguización do ensino...

1.-MESA SECTORIAL

Antes de comezar coas nosas propostas preguntamos sobre a constitución á Mesa Sectorial.

RESPOSTA : despois de constituírse a Mesa Xeral da Función Pública, o que provocará a imposibilidade de asistir durante este curso á Mesa Sectorial.

Ante esta situación instamos a que se tivesen en conta as nosas aportacións aos decretos do desenvolvemento da LOE.

RESPOSTA : serán tidas en conta.

2.-DESENVOLVEMENTO LOE : horarios e currículos

-Demandamos a participación dos representantes sindicais na elaboración de horarios e dos currículos das materias.

RESPOSTA : só se nos informará. Os currículos están a ser traballados por expertos/as.

-Solicitamos a racionalización dos horarios das materias máis prexudicadas pola LOE para evitar a precarización do traballo do profesorado e a perda do posto de traballo do profesorado interino. Solicitamos que o horario de Relixión se reduza ao mínimo esixido por Lei. Plantexamos a posibilidade que a partir de 2º de ESO a relixión se oferte como alternativa (como se está a facer en Catalunya) co que se subsanaría gran parte do problema horario que a LOE provoca a distintas materias.

RESPOSTA : no tocante a relixión cumprirán a legalidade ofertando só o mínimo imposto pola lei. Dubidan de que sexa legal o que se fai en Catalunya, máis prometeron estudalo.

- Pedimos que se axilizase o dereito do profesorado ao acceso gratuíto a museos e bibliotecas

RESPOSTA : non o tiñan como prioridade máis tomaron nota e faríano.

3.-OPOSICIÓNS E OFERTA PÚBLICA DE EMPREGO

3.1 OPOSICIÓNS

Esiximos a organización, control do proceso e unhas instrucións claras aos presidentes dos tribunais para evitar os problemas que se deron outros anos como o reparto de prazas por tribunal para cada día de exame, a criba inxustificábel no primeiro exame, a diferenza de notas dun tribunal a outro...en definitiva o que STEG demandou foi que o tribunal se dedique a dar notas e que sexa a administración quen bareme e adxudique ás prazas. O único que esiximos é que se respecte a lei vixente e se faga un verdadeiro concurso oposición e non só oposición como ata agora.

RESPOSTA : estaban de acordo co noso prantexamento e tomarán as medidas oportunas para evitar os posíbeis vicios do sistema.

3.2 OFERTA PÚBLICA DE EMPREGO (OPE)

Preguntamos pola cantidade e prazos da Oferta Pública de Emprego.

RESPOSTA : depende do novo RD de acceso, de aprobarse, haberá unha oferta ampla.

Defendemos unha racionalización da OPE xa que non nos parece ben que un ano se oferte un número de prazas alto e nas vindeiras convocatorias sexa reducido. Pensando na calidade do ensino público é mellor un reparto equitativo en varios anos ao non ter que aprobar a unha porcentaxe alta dunha licenciatura (tendo que baixar o nivel) e impedindo ou dificultando a posibilidade de acceso para as vindeiras licenciaturas.

RESPOSTA: a oferta deste ano non suporá un pico, senón que intentarase manter mentres dure a transitoria.

3.3 OPE E PROFESORADO INTERINO

O STEG defende a necesidade da OEP, máis nunca esa oferta debe por en perigo os postos de traballo do profesorado interino. Demandamos que nesa oferta se garanta o traballo de todo este colectivo.

RESPOSTA : a oferta no porá en perigo os postos de traballo na medida en que o novo RD facilitará o acceso deste colectivo

4.-PROFESORADO INTERINO

Expuxemos a nosa postura en defensa da estabilidade deste colectivo e en contra da precariedade das súas condicións de traballo. Demandamos encarecidamente que reciba a plataforma pola estabilidade para que lle expliquen as intencións da consellaría, esiximos a apertura de negociacións sobre estabilidade e acelerar o pago nos trienios. Expuxemos, tamén, a nosa demanda con respecto ao colectivo do 94.

RESPOSTA : Aseguran que a estabilidade virá dada polo proceso de concurso –oposición. Demandan expresamente de todas as organizacións sindicais que transmitamos a seguinte mensaxe : o proceso transitorio da LOE servirá para que unha alta porcentaxe deste colectivo supere as oposicións. Para a administración o novo RD é a resposta á estabilidade do profesorado interino. Agardarán á realización do primeiro proceso co novo RD para avaliar como serviu de solución á estabilidade do profesorado. Contan que unha vez rematado o proceso transitorio o nº de profesorado interino verase reducida a un 6-7% e entón estarán en condicións de falar de estabilidade. Ata que remate o proceso este tema non se tocará.

No que a PLATAFORMA se refire, consideran que os representantes sindicais son os interlocutores válidos de calquera colectivo do profesorado. Non poden recibir a todo colectivo que o requira. Poñen como exemplo que podería unha asociación de licenciados solicitar o mesmo.

O pago dos TRIENIOS é un problema de toda a Función Pública e polo tanto de Presidencia. Os pagos dos interinos/as serán realizados sen retraso cando se poida legalmente.

No tema do 94 e dos PT entenden como lóxica a petición de cursos de formación para a habilitación de novas especialidades e estudarán a posibilidade de realizalos. Tamén entenden a nosa protesta en contra da solución dun problema ao crear outro que vai en detrimento da calidade do ensino. Por elo asumen estudar a proposta do STEG de ofertarlle ao colectivo do 94 interinidades en primaria e substitucións en secundaria. Tamén valoran o traballo do STEG para intentar facer unha reunión cos dous colectivos para demandar unha solución que satisfaga a todas as partes.

5.- RATIOS

Demandamos a mellora das ratios tal e como se prometera.

RESPOSTA : teñen a intención da redución do alumnado por aula, e non é un problema de persoal senón na maioría dos casos de falla de espazos para abrir máis unidades. Pretenden empezar por infantil e alí onde non sexa posíbel abrir unidades (algúns centros das grandes cidades), incrementar o profesorado de apoio.

Estudan a posibilidade de reducir a matrícula, en 3 anos, a 23 alumnos cara o curso que vén.

Expuxemos a necesidade de establecer as ratios para os agrupamentos multinivel. Actualmente a inspección segue o criterio de 20 en infantil e 16 en primaria.

RESPOSTA : Descoñecían o tema e intentarán arranxalo.

6.-ENSINO EN GALEGO

É inaceptábel que a día de hoxe haxa pais e nais que non poden educara aos seus fillos en galego. Ademais das lei é imprescindíbel que haxa control sobre o cumprimento da Lei de normalización lingüística e do Plan de Normalización do Parlamento.

RESPOSTA : pretenden mellora a oferta de ensino en galego máis sempre posibilitando a dobre vía.

7.-CADROS DE PERSOAL E REGULAMENTOS ORGÁNICOS DOS CENTROS

Pedimos que se negocien uns novos cadros de persoal actualizados a realidade actual e que se modifiquen os regulamentos orgánicos co fin de tender a equiparación das condicións de traballo dos diferentes corpos.

RESPOSTA: Estase elaborando un único ROC que englobará a todos os actuais. Só nos adiantou que os especialistas de primaria terán que impartir as súas materias en Ed. Infantil.

Expuxémoslle que nos rexeitábamos esa medida, basicamente por cuestións pedagóxicas.

8.- CENTROS CONCERTADOS

Esiximos unha revisión seria dos concertos pois hai moitos que non reúnen os requisitos mínimos esixidos por lei.

Tamén insistimos na nosa negativa á concertación dos ensinos non obrigatorios.

RESPOSTA: A 1ª parte sen resposta. Respecto a 2ª, o ensino infantil hai que concertalo por lei e actualmente só hai concertado algún de FP da etapa anterior.

Nos últimos minutos da entrevista só tivemos tempo de avanzar a nosa liña xeral de actuación con respecto aos seguintes temas:

9.- RURAL E PREESCOLAR NA CASA.

Non podemos defender o modelo do rural se seguimos a pechar escolas rurais polo que é preciso non pechar máis escolas e tamén solucionar toda a problemática do colectivo das traballadoras e traballadores de preescolar na casa.

10.- ORIENTACIÓN

Comentamos a necesidade de modificar e desenvolver a lexislación actual sobre Orientación ao abeiro da nova lei orgánica. Non houbo moito tempo para profundizar neste tema e comentamos brevemente algo sobre a ratio orientación/alumnado, as situación da orientación en primaria, os equipos de orientación específicos etc. Demandaremos unha entrevista coa Directora Xeral de Innovación Educativa para tratar este tema máis polo miúdo.

Solicitamos que se teña en conta o número de alumnos e alumnas que se atenden desde un Departamento de Orientación para crear novas prazas de Psicoloxía e Pedagoxía.

Demandamos unha solución para a Orientación en Primaria,

11.- EDUCACIÓN DE ADULTOS.

Reclamamos a revisión da Educación a Distancia e Semipresencial dotando de persoal docente a todas as comarcas para evitar que o alumnado da comarca de Compostela tivesen maiores facilidades que o do resto do País.

Secratariado Nacional do STEG
febreiro 2007