A aposta da consellaría polo galego: covarde e miserenta

Decepcionante, miserento, covarde,... e un sinfín de adxectivos aínda máis duros merece a Circular da Consellaría que pretende, din, impulsar o uso do galego. A circular leva como título “Convocatoria de accións para a potenciación do ensino en lingua galega na educación infantil (3-6 anos) da D.X. de Ordenación e Innovación Educativa e da S.X. de Política Lingüística” e remitiuna o 26 de maio aos centros. Na mesma inclúense os requisitos de “contar co compromiso do profesorado implicado no proxecto; a autorización dos pais, nais ou titores do alumnado implicado; o acordo do Claustro e a aprobación do Consello Escolar; e contar con alumnado suficiente para a composición dun grupo, sen que supoña ningún incremento no número de unidades”.

Nos últimos tempos atopámonos con políticos que abusan do galego ao instrumentalizalo como unha mera estratexia electoral e danse a volta e falan en español. Nesta galería de despropósitos leva a palma a aplicación da consabida Lei de N.L., lei consensuada por todos os grupos políticos, mais que ninguén reparou no seu reiterado incumprimento. Proba disto é a baixa de falantes de galego entre a xente nova deste país. O STEG agardaba do novo goberno unha aposta decidida e firme que situase á nosa lingua no lugar que se merece e sorpréndenos cunha Circular tan cativa que non afectará nin ao 2% do alumnado galego.

Para poder ofrecer a dobre vía, é preciso tal cantidade de papelexo administrativo que mesmo semella un atranco. Estas trabas administrativas constátanse coa evidencia de que algúns centros non poderán impartir as aulas en galego a pesar de que 15 familias tiñan ese interese. Vai ser esta a aposta da Consellaría pola lingua?. E no rural? Tampouco a Administración vela polo cumprimento da lei que obriga ao ensino na lingua materna maioritaria do alumnado. Cando se cumprirá a obriga de impartir como mínimo un 50% do tempo en galego en Primaria? Desde o STEG denunciamos esta situación que ten como causa a desidia e falta de interese da anterior administración. Seguirá este goberno o mesmo camiño? As boas palabras da Conselleira afirmando “continuar e expandir” o ensino en galego de novo nos parecen máis fume para consumo dos medios de comunicación.

ESIXIMOS a extensión da posibilidade de aulas en galego para todo o País e a desaparición das trabas administrativas que dificultan en vez de facilitar. Demandamos, como auténtica forma de potenciación da lingua, que con 5 alumnas/os xa se poida formar un novo grupo sen necesidade de que exista dobre liña no centro. Isto si que sería unha medida saudábel para a lingua e non mera palabraría electoralista. Parafraseando ao noso escritor demandamos milleiros de aulas máis para a nosa lingua.

Secratariado Nacional do STEG
setembro 2006