CALENDARIO ESCOLAR CURSO 2007-2008
Aclaracións da postura de STEG ante a imposición da Consellaría

Diante da situación creada pola Consellería de Educación ao modificar de xeito unilateral o calendario escolar eliminando a xornada reducida nos meses de setembro e xuño, que leva funcionando de xeito satisfatorio desde hai máis de 30 anos, o STEG quere deixar clara a súa postura diante do todo o profesorado.

Resumo do acontecido:

• Ante a proposta da Consellaría de modificación do calendario escolar para o vindeiro curso o STEG sae aos medios de comunicación rexeitando as modificacións introducidas. Por unha banda por modificar as condicións laborais do profesorado e por outra, e máis importante se cabe, por que sinceramente pensamos que é prexudicial para a calidade do ensino.
  Para máis información ver o noso artigo de opinión ao respecto.

• Todas as organizacións sindicais presentes na Mesa Sectorial (lembrar que o STEG, por cuestións administrativas, aínda non está presente en dito órgano) rexeitan a medida e asinan un documento conxunto solicitando retomar o tema e ameazando con mobilizarse. O STEG en ningún momento foi chamado polos demais sindicatos para apoiar esta medida.

• A Consellaría responde coa publicación da orde no DOG.

• Rómpese a unidade sindical, a CIG por un lado e ANPE, CCOO, CSIF e UXT por outro.

  • O STEG decide acudir á convocatoria da CIG o martes 17 de abril e presentarse na rolda de prensa das outras organizacións co obxectivo, nas dúas reunións, de percurar a unión sindical. A CIG e o STEG deciden convocar a todas as OO.SS a outra reunión para o día 18 de abril á cal só asisten STEG e CIG.
  • Despois de ver a dificultade para a unidade de acción decidimos convocar folga coa CIG o 3 de maio e apoiar toda mobilización que procure os mesmos obxectivos.
  • Por elo apoiamos as mobilizacións convocadas pola plataforma , non sen antes, intentar facerlles ver que era mellor ir todos xuntos e unirse á folga xa convocada polo STEG e a CIG.
    
• Non imos entrar nós a valorar quen ten máis ou menos culpa, simplemente lamentar a desunión sindical fronte a un tema de tanta transcendencia para o ensino. Non nos parece de recibo que en temas nos que todos estamos de acordo sexan cuestións de forma, unha vez máis, as que nos leven á desunión, por iso demandamos de todas as organizacións ese pequeno esforzo para demostrar ao conxunto do profesorado que o que realmente nos interesa é una escola pública de calidade.

• Como isto non parece posible, decidimos participar activamente en todas as mobilizacións convocadas a prol de parar esta medida, tanto con uns como con outros. Desde o STEG queremos deixar claro que a nosa loita é contra o decreto da administración e polo tanto seguiremos a traballar para conseguir a unidade sindical.

Se a Consellaría non muda a súa postura no que resta de curso, o STEG non dará por perdida esta loita. No mes de setembro, xunto con todas as organizacións sindicais que así o desexen, e por suposto co apoio do profesorado, trataremos de continuar coas mobilizacións. Folga indefinida polas tardes en setembro, un día de folga á semana..., e todas aquelas medidas que conxuntamente decidamos.

Secretariado Nacional do STEG
abril 2007