| O MEC quere
impoñer un estatuto do profesorado inquietante, regresivo e xerarquizador
Na Mesa Sectorial de Educación celebrada o
30 de maio, o Subsecretario do MEC suscita unha falsa negociación
do Estatuto Básico do Profesorado: pretendía que antes
do 15 de xuño a representación do profesorado aprobase
un Estatuto que vai cambiar por completo a normativa que regula as condicións
de traballo e as retribucións do profesorado dos centros públicos
de educación básica e secundaria.
O Ministerio de Educación, que non cumpriu o seu compromiso de
entregar o texto articulado do proxecto de Estatuto o pasado mes de
marzo, pretendía pechar a negociación sen dar tempo a
que o conxunto do profesorado coñeza a proposta do MEC e poida
valoralo, dar a súa opinión e realizar propostas alternativas
a través dos seus sindicatos. O proxecto, segundo afirma o MEC,
é froito das negociacións coas organizacións asinantes
do acordo (vergoñento) de 20 de outubro -CCOO, CSI-CSIF, FETE-UGT
e ANPE.
O STEG, a través da Confederación de STES-intersindical
da que forma parte, rexeitou na Mesa Sectorial clara e rotundamente
o procedemento proposto polo Subsecretario, esixindo tempo para a negociación,
tempo para que o profesorado coñeza e opine sobre esta proposta.
Suscitamos a necesidade de que o proxecto de Estatuto trabállese
nunha Mesa Técnica antes da súa valoración na Mesa
Sectorial e que a negociación se prolongue e chegue aos primeiros
meses do próximo curso 2006-2007, pois os cambios que suscita
o MEC son demasiado importantes como para que o goberno pretenda impoñelos
nunha falsa negociación, impropia do talante do que fai gala
o goberno.
Esta presión do STEG e da confederación propiciou que
as demais organizacións sindicais considerasen necesario un aprazamento
para poder facer un estudio en profundidade tal e como demandaba o STEG.
Só así poderá ser coñecido polo conxunto
do profesorado e así poderá opinar sobre un Estatuto que
afectará ás condición das traballadoras e traballadores
do ensino galego.
Entre os aspectos que no STEG consideramos máis prexudiciais
para o profesorado queremos destacar os que seguen:
- É inquietante e xerarquizador ao supor a creación
dunha mal chamada carreira profesional do profesorado que se vincula
a criterios arbitrarios, non obxectivos, e dependerán dos
superiores xerárquicos correspondentes. O MEC pretende que
o principio de arbitrariedade presida a nova forma de promoción
do profesorado, poñendo ao conxunto do profesorado baixo
sospeita de non traballar ou de realizar mal o seu traballo. Preténdese
aplicar ao profesorado un sistema xerarquizador formado por oito
grados, con consecuencias retributivas e para os concursos
de traslados, que dependerán en boa medida de criterios subxectivos,
sen ter en conta que a educación é e debe ser un traballo
en equipo; é inquietante e regresivo que se trate de fomentar
a competitividade entre o profesorado.
- É inquietante e regresivo o concepto de avaliación
voluntaria que quere impoñer o MEC. Unha gran parte
dos cambios que introduce este Estatuto baséanse neste tipo
de avaliación, o profesorado que queira someterse á
mesma, e supérea, verá recoñecidos unha serie
de méritos con repercusión na promoción interna,
o concurso de traslados e as retribucións.
- É regresivo o papel que se pretende asignar ás
direccións dos centros e a inspección educativa,
que pasarán a ser determinantes na avaliación do profesorado,
polo que o risco de submisión e servilismo son evidentes.
¿Quen se atreverá a cuestionar a persoas que logo
han de avaliarte? ¿Cantas evitarán actitudes críticas,
pola mesma razón?
- É regresivo que non se asegure a mobilidade do profesorado
vía concurso anual de traslados. É inquietante que
se pretenda deixar en mans da Administración a redistribución
e recolocación de efectivos ao subordinalos ás necesidades
da mesma: é dicir, que a obtención de destino
definitivo nun posto de traballo non supón ningunha garantía
de estabilidade senón que se faculta á administración
educativa para trasladar con carácter forzoso ao profesorado.
É regresivo que desapareza o concepto de persoal orgánico
dos centros.
- É regresivo que se pretendan fixar as retribucións
complementarias desde o goberno central, cando a xestión
do profesorado corresponde ás comunidades autónomas,
o que supuxo levar a negociación desas retribucións
a cada Consellería de Educación; negociación
que se demostrou efectivo, pois este tipo de retribucións
aumentaron coa negociación descentralizada. Agora queren
acabar con esta posibilidade de avance invadindo competencias das
comunidades autónomas.
- É inquietante e regresivo que se pretenda limitar
a liberdade de cátedra do profesorado co proxecto
educativo dos centros.
- É regresivo que o proxecto non recolla dereitos
do profesorado que xa teñen nalgunhas comunidades,
como a inexistencia dos chamados sexenios e o cobro do total dos
mesmos desde o inicio da vida profesional, a posibilidade do chamado
“ano sabático” ou o pago da antigüidade
ao profesorado interino.
- O proxecto de Estatuto non avanza na asignación do grado
equivalente a Licenciatura para os estudos de Maxisterio, polo que
non o asigna dentro do Grupo A ao corpo de mestres,
incumprindo unha promesa electoral do PSOE.
- Por outra banda, contén elementos que van claramente
contra a creación de emprego, como o mantemento
da posibilidade de xubilación aos 70 anos; tampouco se contempla
a prórroga da xubilación voluntaria con carácter
indefinido para o profesorado que teña 60 anos ou 30 de servizos
nin a redución para maiores de 55 anos (quen queira esa redución
verá diminuído o seu soldo).
- O tratamento que se dá ao profesorado interino
é regresivo especialmente se o comparamos con algúns
aspectos alcanzados en Comunidades Autónomas. O sistema de
acceso previsto continuará deixando na precariedad ou no
paro a miles de docentes que desempeñaron o seu traballo
para a administración.
- É inquietante que a saúde laboral do profesorado
pareza importar pouco ao MEC, dado que neste apartado non
se reflicte nada sobre as enfermidades profesionais do profesorado
e a necesidade de recoñecelas e catalogalas.
Para o STEG é, en definitiva, un mal proxecto
de Estatuto que non recolle reivindicacións históricas
do profesorado e non ten en conta a realidade do noso país querendo
impoñer un modelo uniformador e centralista.
Desde o STEG levaremos esta información aos docentes para que
poidan informarse e formarse unha opinión sobre o mesmo e esixiremos
ao MEC que se respecten os dereitos adquiridos de quen desempeñan
en condicións cada vez máis difíciles a tarefa
de ensinar. Ademais esixiremos do Goberno Galego unha clara implicación
neste proxecto que afecta a máis de 30000 traballadoras e traballadores
galegos.
Borrador
do estatuto do funcionario docente (pdf
416kb)
Secratariado Nacional do STEG
setembro 2006 |
