Negociación da estabilidade
Cada comezo de curso, viñamos denunciando as irregularidades nas listas e sobre todo, que decenas e a veces centos de compañeiras e compañeiros que integran o colectivo con moitos anos de antigüidade, se quedaban sen traballo. Sen traballo e sen a posibilidade de poder facer valer esa experiencia tan valorada, por non dicir imprescindible, na maioría dos diferentes campos laborais.

Este ano, aínda que seguimos denunciando esas irregularidades na xestión das listas como sempre fixo o STEG, a verdade é que a realidade pinta doutra cor, unha cor máis optimista. Temos diante de nós a posibilidade de negociar un Pacto de Estabilidade, pacto que, como sabedes, temos presentado coa Plataforma do Profesorado Interino dende febreiro de 2003.

Esta negociación foinos “roubada” nestes anos. E non o dicimos de balde, dicímolo con datos. Nunca se levou á Mesa Sectorial a nosa proposta, incumprindo os acordos da propia Mesa, na que todo o que chegara presentado cunha porcentaxe de polo menos o 30% da representación sindical, tiña que ser negociado. Pois ben, os asinantes do acordo, entre os que figuramos a Asociación de PNNs e tres sindicatos con representación en Galicia: CIG, STEG e UXT, non só representamos ese 30%, senón que somos a maioría sindical na nosa comunidade. A pesar disto, nunca se negociou. O porque temos que preguntarllo á anterior Consellaría e aos outros tres sindicatos (CCOO, ANPE e CSI-CSIF) que nunca quixeron entrar no acordo, aínda ofrecéndolles todas as posibilidades para que o fixeran, entre elas a negociación dun novo acordo.

Este novo pacto podédelo consultar na web do STEG, , así como as novidades que vaian xurdindo na negociación. Temos neste momento solicitada unha entrevista coa nova Consellaría de Educación para comezar cos trámites da negociación e ir sentando as bases dese futuro Pacto de Estabilidade que desta vez pode facerse realidade.

O acceso: a outra cara da moeda
Outra cousa ben diferente é falar de acceso. Como sabedes o STEG e a Confederación de STEs-i da que formamos parte, temos solicitado do MEC (é neste organismo onde se regula o acceso) un Acceso Diferenciado.

Na actualidade o colectivo de Profesorado Interino no Estado supera as 80.000 persoas. Razón máis que suficiente para que todo o mundo se poña a traballar na solución deste grave problema. A ninguén se lle escapa o tempo que o STEG leva presentando propostas de solución.

Neste momento está a correr o rumor de que se pode levar a cabo unha transitoria ao estilo das da LOXSE coa que estarían de acordo varios dos sindicatos do sector. Queremos deixar ben claro que ao STEG e á Confederación de STES-i, tamén lle valería a transitoria, agora ben, sempre e cando vaia acompañada dunha posterior medida ordinaria en forma de acceso diferenciado que dea solución definitiva ao problema. Doutro xeito, isto sería pan para hoxe e fame para mañá.

Explicámonos: o problema do colectivo precisa dun cambio estrutural, polo tanto de medidas ordinarias. E o que se está a negociar é unha solución conxuntural, polo tanto extraordinaria, que soluciona o problema a unha parte das persoas que hoxe forman parte do colectivo, pero que dentro de 10 anos a situación volverá a ser a mesma. Serva como exemplo o que está sucedendo despois de 10 anos das transitorias LOXSE.

Temos que ser conscientes de que, neste momento no que se vai a tramitar LOE no Parlamento do Estado, é a única posibilidade que queda para cambiar a Disposición Adicional Duodécima que regula o acceso. A situación non é fácil, o PSOE incluso está convencendo ao PP para que entre no pacto, o que quere dicir que a LOE pode ter moitos anos de vida e a posibilidade de modificar o acceso, se non se fai agora, quedaría pechada por moitos anos.

Polo tanto, insistimos: É MOITO O QUE SE ESTÁ A XOGAR. E precísase dunha resposta contundente do colectivo se ao final só se quere aprobar a transitoria. Hai que ter presente, que se isto se confirma, tan só unha saída á rúa combinada con xornadas de folga, salvarían a moita xente de rematar engordando as listas do paro.

O STEG e a Confederación de STEs-i, témolo previsto e para elo temos convocadas as seguintes xornadas de folga se non se dá unha solución definitiva ao problema. As datas son as seguintes: 19 e 26 de outubro; 10, 16, 17, 23 e 30 de novembro onde se remataría cunha gran manifestación en Madrid.

POR DURO QUE PAREZA,
MOBILIZACIÓN E FOLGA OU PARO.
TI DECIDES.

Secratariado Nacional do STEG