O trámite parlamentario de aprobación do Proxecto LOE para se converter en Lei, supón un momento clave para loitar e conseguir o "acceso diferenciado" para o profesorado interino.
Para conseguilo necesitamos da unidade do colectivo de todo o Estado, da unidade das organizacións sindicais e da mobilización…; fai falta que nos movamos para presionar ao goberno central e aos partidos que o sustentan no Parlamento, e facerlles ver o dereito que temos a permanecer con carácter definitivo e como funcionarios no ensino público, tal e como esiximos na folga e manifestación que realizamos perante o MEC o pasado 8 de xuño. Esta permanencia, á marxe dos pactos de estabilidade que podan conseguirse coas distintas administracións autonómicas, pasa por modificar a actual normativa de acceso.
O colectivo de interinos e interinas do STEG, así como da Confederación de STEs-Intersindical en todo o Estado, temos unha proposta moi clara e moi concreta de acceso diferenciado que queremos que se inclúa no texto da futura LOE e dentro do apartado referido ao acceso á función pública docente; e que di:
"Acceso diferenciado para o profesorado interino. As administracións educativas realizarán, xunto á convocatoria de concurso-oposición descrita no punto anterior, unha convocatoria de acceso diferenciado para o profesorado interino con máis de tres anos de servizos ás administracións educativas. Nesta convocatoria a proba non terá carácter eliminatorio.".
Agora, cando acaba de se iniciar o curso, o STEG iniciou contactos co MEC e os grupos parlamentarios do Congreso para conseguir a inclusión desta forma de acceso na nova Lei, e como nas negociacións desenvolvidas co goberno nos meses de debate sobre o Anteproxecto de LOE non se aprecia vontade pola súa parte -coa complicidade de algúns sindicatos- para aceitar esta forma de acceso, estamos a iniciar tamén os contactos con todas as organizacións que defenden o acceso diferenciado para organizar unha mobilidade unitaria, sostida e contundente para facer ver ao goberno e ao Congreso dos Deputados a xustiza da nosa reivindicación.

7 setembro 2005
Secratariado Nacional do STEG