O
MECD dá por pechada a negociación de sistema de acceso dando a espalda
ao profesorado interino
Tras a mesa sectorial do
11 de decembro, entre a Administración educativa e os sindicatos representativos
do ensino público non universitario, desde o Ministerio dáse por
concluído o proceso de negociación dun novo sistema de acceso á
función pública docente iniciado o pasado mes. E dáse por
concluído sen que se introducira no regulamento ningún troco digno
de mención para solucionar o problema de precariedade e inestabilidade
laboral que afecta ao 25% do profesorado. Seguiuse ao pé da letra o modelo
"negociador" ao estilo Pilar del Castillo, é dicir, mantendo
da negociación o que non é máis que a súa mera aparencia.
Desde un principio, opostos a que se abordara na
mesa a discusión sobre o modelo de ingreso diferenciado defendido polo
STEG, os representantes do MECD, parapetados tras escusas técnicas que
non foron razoadas, optaron por manter un simulacro de diálogo en torno
a cuestións que en nada van modificar a situación actual. A experiencia
docente, tan valiosa, seguirá sendo un elemento residual do baremo; as
probas da oposición seguirán sendo eliminatorias e as novidades
máis reseñables, como a convocatoria específica para o rexurdido
corpo de catedráticos, levan o cuño reaccionario da LOCE, co que,
lonxe de avanzar nalgunha dirección, a situación empeora.
Desde o STEG e a Confederación de STES proseguiremos coa campaña
de concienciación e demanda dun troco no modelo de acceso que vimos defendendo
desde hai anos. Esta necesidade queda reflectida no recente informe do "Defensor
del Pueblo", no que se constataba a situación laboral que padecen
unhas 80.000 profesoras e profesores que traballan para o sistema. Un colectivo
o suficientemente amplo como para que o Ministerio o teña en conta.