Xoves, 9 de xuño
A Consellaría retira a proposta de estabilidade

Na Mesa celebrada o xoves 8 de xuño, a consellaría retirou a súa proposta (lembremos: estabilidade para o profesorado con 50 anos e 15 de servizo) e deu por rematadas as negociacións sobre estabilidade.

Previamente a celebración da Mesa, tivo lugar unha xuntanza entre os membros da plataforma -STEG, CIG e a Asociación de PNNs- con UGT e ANPE, con fin de levar a Mesa unha proposta avaliada por unha ampla maioría sindical. Nesta xuntanza acordouse que calquera acordo de estabilidade tiña que estar baseado nos anos de servizo (a negociar) e que tiña que ser aberto (o profesorado que fora cumprindo ese requisito, iríase incorporado ao mesmo).

Desde o STEG, parécenos incomprensible a falta total de talante, do que tanto presume esta Consellería e este goberno, retirarse sen máis dunha negociación que buscaba acabar co traballo en precario de máis de 4000 profesores. Esta incomprensión resulta máis doente se temos en conta o prometido, en favor da estabilidade do colectivo, nas xuntanzas mantidas este curso coa Consellería e cos responsables dos grupos parlamentarios do goberno.

O venres 9 de xuño terá lugar unha Asemblea ás 18h. no IES Rosalía de Castro, no que segue a manterse o peche indefinido, e na que se debaterán as medidas a tomar a partir de agora.