<< Portada STEG

Tempo de Mulleres, Mulleres no Tempo.
Calendario editado pola Asemblea de Mulleres do STEG, en colaboración co Instituto de la Mujer.

Neste calendario, en todos e cada un dos días do ano, aparecen referencias a mulleres, e as súas aportacións ao arte, á ciencia, ao coñecemento, á xustiza social, á música... aportacións que na maioría de casos teñen sido ignoradas e invisibilizadas. Dende o STEG realizamos un importante traballo de investigación e recompilación co obxectivo de recuperar os nomes, vidas, historias e aportacións de todas elas ao coñecemento e experiencia universal.

Das 365 datas con nomes e historias de mulleres 45 son galegas, nacidas e/ou con experiencias vitais vencelladas a Galiza. Agora nós, as mulleres do STEG, pretendemos render unha sinxela homenaxe a estas mulleres, e contribuír ao tan necesario cambio no imaxinario colectivo, que sigue situando ás mulleres fundamentalmente no ámbito doméstico, na dependencia e na subordinación.

Queremos recuperar cada día a referencia a un nome, unha historia, un compromiso, un descubrimento, porque o coñecemento real da nosa historia axudaranos a avanzar neste tempo de mulleres. Ademais, esperamos que sexa un material útil e valioso para os centros educativos, tan necesitados de superar os estereotipos de xénero e avanzar cara un modelo coeducativo.