Proposta didáctica 8 de marzo, 2001

ALUMNADO

Infantil e Primaria

Dramatizar algúns contos tradicionais cambiando o sexo dos/as protagonistas.

Crear diferentes recunchos na aula con distintas tarefas domésticas para que nenos e nenas as practiquen e valoren.

Representar nun cuadro de dúas entradas "Un día na vida dos membros da túa familia"

Visitar algún centro de traballo próximo e analizar como están distribuídas as responsabilidades por sexos.

Na hora do recreo traballar co espacio, tentando redistribuílo. Traballar con xogos cooperativos e conseguir que as nenas ocupen tamén a parte central do patio.

Traballar a afectividade. Por exemplo, dramatizando situacións cotiás nas que expresemos de distintos modos o afecto entre familiares, amizades, etc.

---

 

Secundaria

 

Averiguar por qué o 8 de marzo é o Día Internacional das Mulleres.

Investigar sobre cándo e cómo acceden as mulleres ao voto.

Elaborar murais coas fotos e a historia de mulleres que destacaron en distintos aspectos da cultura.

Revisar a prensa e analizar a presencia de homes e mulleres nas distintas seccións e artigos.

Realizar unha revisión crítica das entradas do diccionario nas palabras Home e Muller e nalgúns adxectivos asociados a homes e mulleres (verdulero-verdulera, público-pública, fulano-fulana, zorro-zorra, etc).

Realizar redaccións nas que o alumnado imaxine cómo será a súa vida sendo un rapaz e sendo unha rapaza. Analizar críticamente as diferencias.

---

 

PROFESORADO

Só na medida que recoñezamos as nosas actitudes sexistas seremos quen de modificalas e, o que é máis importante, de transmitir ao noso alumnado pautas de comportamento diferentes.

 

Propostas

 

Revisa a linguaxe que se utiliza na documentación que se manexa no centro procurando que non invisibilice ás mulleres.

Reflexiona sobre a linguaxe que utilizas na aula, nomea ás nenas.

Observa e corrixe as expresións despectivas que se utilizan asociadas ao feminino.

«A diferencia sexual non é a linguaxe quen a crea. O que debe

facer a linguaxe é, simplemente, nomeala, posto que existe. De termos en

conta que homes e mulleres temos o mesmo dereito a ser e a existir, o feito

de non nomear esta diferencia é non respectar un dos dereitos fundamentais: o da

existencia e a representación desa existencia na linguaxe».

---

 

FAMILIA

Enviar unha carta ás familias explicando por qué o 8 de Marzo é o Día Internacional das Mulleres, e lembrando que:

Ningún sexo é máis intelixente, habilidoso, creativo, cariñoso, etc. que o outro

Se queremos que as nosas fillas e fillos desenvolvan todas as súas posibilidades a escola e a familia debemos facer esforzos para:

> Considerar a mozos e mozas coas mesmas responsabilidades.

> Respectar os seus gustos, diversións, amizades, aínda que no encaixen nas atribuídas tradicionalmente a cada sexo na nosa sociedade.

> Favorecer que asuman as tarefas domésticas como responsabilidade de todas as persoas que viven na casa.

> Mostrar afecto tanto aos rapaces como ás rapazas, e acoller favorablemente as suas expresións de afecto.

> Desenvolver o seu espíritu crítico ante os modelos que ofrece a sociedade, axudándolles a construír alternativas a esta situación

En conclusión, dar ás rapazas autonomía, valoración delas mesmas, afirmación...e aos rapaces, a posibilidade de expresar os seus sentimientos, de non agochar os seus medos ou debilidades...A ambos, rapaces e rapazas, a posibilidade de ser elas mesmas, e non necesariamente o qué a sociedade está a agardar.

«Hai que iniciar a destrucción da masculinidade e feminidade tradicionais (..) posto que o desigual ritmo dos perfís de xénero está dificultando as nosas vidas, as de homes e mulleres, as nosas relacións, as nosas posibilidades. Estannos a poñer moi difícil a comprensión mutua, e incluso aquilo que chamamos felicidade.»

Marina Subirats

---

BIBLIOGRAFÍA

FRANCE, P. Hacia una educación infantil no sexista. Morata. Madrid, 1988

MORENO,M. Cómo se enseña a ser niña: el sexismo en la escuela. Ed.Icaria,Barcelona,1986.

OLIVEIRA MALVAR, M. Eros: Materiais para pensar o amor. Ed. Xerais, Vigo 1994

PÉREZ, M. E CURRAIS,X. Feminino e masculino. Materiais de Coeducación. Educación Secundaria. 4 vol. Ed Xerais, Vigo 1995

SEMINARIO DE EDUCACIÓN PARA LA PAZ Sistema sexo-género. Unidad didáctica. Ed. Los libros de la catarata, Madrid 1996

SUBIRATS,M., E BULLET,C. Rosa y azul: la transmisión de los géneros en la escuela mixta. Instituto de la Mujer, 1988.

URRUZOLA, M.J. ¿Es posible coeducar en la actual escuela mixta? Una programación curricular sobre las relaciones afectivas y sexuales. 1991.

CUADERNOS PARA LA COEDUCACIÓN. Varios títulos. Institut de Ciències de l’Educació.