Os centros integrados de FP
Exemplo de privatización do sistema educativo

O pasado 30 de decembro de 2005 publicouse no BOE o RD 1558/2005, que regula os requisitos básicos dos Centros Integrados de Formación Profesional.

O STEG e a Confederación de STEs-intersindical, xunto coas forzas que se opuñan naquel momento á política educativa do Partido Popular, rexeitamos a Lei 5/2002, da Formación Profesional e as Cualificacións, por considerar que non integraba os tres subsistemas e abría á porta á privatización.

Pensabamos e seguimos pensando, que esta lei -que o PSOE cualificou como irresponsábel e improvisada-, é un instrumento en mans das empresas para preparar man de obra flexíbel e adaptábel ás necesidades de competitividade e productividade do “mercado laboral”, abandonando obxectivos educativos e sociais. Iso si, coa colaboración, reservada explicitamente na lei, aos chamados axentes sociais (determinados sindicatos e patronais).

Analizando brevemente o RD 1558/2005 destacamos 3 cuestións que motivan o noso rexeitamento e que se deben ter en conta para analizar o futuro das ensinanzas profesionais:

1- Concertación. Ademais doutros tipos de subvencións, contempla o réxime de concertos para estes centros, aos que lles permitirán impartir bacharelato e certificar competencias profesionais (artigos 3.3, 6.2.a, Disposición Transitoria 1ª). É dicir, concertaranse niveis non obrigatorios como xa denunciamos no trámite da LOCE no seu momento e agora da LOE.

2- Libre designación da dirección e consellos sociais. Lonxe da xestión democrática e da participación da comunidade educativa, nos Centros Integrados, o profesorado e estudantado queda fóra dos órganos colexiados de decisión en favor dos representantes da Administración e os “axentes sociais”, que pasan a ocupar un lugar privilexiado no Consello Social, que substitúe aos Consellos Escolares.

Sen esquecer que a dirección destes centros é un posto de libre designación da Administración Educativa con competencias para a contratación de persoal, organización de actividades de carácter lucrativo-financiatorio (art. 6.3, 12, 13, 14,...)

3- Cesions de bens públicos a interese privados. No articulado aparecen cuestións inquedantes como a cesión de bens públicos a intereses privados (art. 10.5), e “externalización” de servizos (10.5, 15.3, 13.2.g,...), que significan máis privatización no sistema educativo.

É lamentábel que a Lei da Formación Profesional e as Cualificacións, rexeitada polo PSOE na oposición, sexa mantida e desenvolvida. Decididamente, en materia de FP, o PSOE preferiu, coa complicidade dos axentes sociais, deixar as cousas onde as puxera o PP.

Formación Profesional