NON Á ESTRATIFICACIÓN SALARIAL NO CORPO DE MESTRES
O STEG levou adiante unha campaña pola extensión a todo o Corpo de Mestres do complemento económico do primeiro ciclo da ESO

  Conscientes no STEG de que a aplicación da Reforma Educativa supuxo un enorme esforzo para o profesorado e de que a Administración propuxo, no seu momento, un aumento retributivo para as mestras e mestres que imparten docencia no 1º Ciclo da ESO, obviando unha proposta que abranguera á totalidade do profesorado, RECLAMAMOS que a mellora se estenda a todo o Corpo de Mestras/es, traballe onde traballe.
Para o STEG trátase de valorar o traballo realizado polo profesorado de Educación Infantil, Educación Primaria, Educación Secundaria Obrigatoria e Formación de Persoas Adultas, non esquecendo que, para calquera dos niveis antes citados, se require a mesma formación inicial e idéntica dedicación. Ademais de desempeñar unha única función social, é un traballo exercido co mesmo grao de responsabilidade. Polo tanto, hai que pensar que a diferenza salarial que a Administración establece responde a razóns alleas ao valor da labor realizada.
Para o STEG retribuír do mesmo xeito unha mesma dedicación e grao de responsabilidade non só é xusto, senón que favorece a suma de vontades para traballar en equipo e compartir responsabilidades.
A coherencia do STEG en materia retributiva levounos sempre ó convencemento de que á función docente, que é única, lle corresponde o agrupamento laboral do profesorado nun CORPO ÚNICO DE ENSINANTES. Este histórico posicionamento recibiu o importante apoio inequívoco das Universidades que reivindican a licenciatura para a formación inicial das mestras e dos mestres.
Unha das accións levadas a cabo nesta campaña consistiu en recadar o apoio dos Claustros de profesores e profesoras mediante o envío dunha Acta e Follas de Sinaturas, obtendo resposta de máis de 300 centros (CEIP, CEP, CPI, EEI e CEE) e avalada por preto de 4.000 sinaturas e máis de 200 Actas de Claustro.

  O venres 26 de marzo, fixemos entrega das sinaturas e das actas de Claustro na Consellaría de Educación ao tempo que mantivemos unha entrevista co director xerel de persoal, Severino Somoza quen entendeu como lóxica a reivindicación. Nun tono de cordialidade, porén, manifestou que era inviable neste intre, dado que a Consellaría tiña moitas frontes a que atender e moitos e diversos investos económicos por facer. Pola súa banda, o director xeral e máis o xefe de servizo de Secundaria, Xosé Luís Canosa, tamén presente na entrevista, coincidiron en aclarar que o complemento de 1º Ciclo de ESO fora vontade unilateral do seu Departamento, pois non estaban obrigados por lei a pagar ese diñeiro. O STEG, que recoñecía esa decisión, manifestou que agora chegaba a hora de estender esta medida a todo o profesorado de Primaria, por xustiza e por dignidade ante os profesionais de ensino menos valorados. Desde a Dirección Xeral enténdese que, de ir adiante a nosa reivindicación, isto suporía unha cadea de novas reivindicacións por parte do resto do profesorado do corpo de mestres para volver establecer novas diferenzas. Ante isto o STEG consideraba que hoxe en día, entre o profesorado en xeral, estaba bastante estendida a opinión de que as diferenzas retributivas deberían irse reducindo cada vez máis. Entón, os responsables da Dirección Xeral aproveitaron para dicir que contribuíran a isto coa suba salarial lineal que acordaron con algúns sindicatos o pasado ano. Con todo, citaron varias veces como exemplo positivo o artigo 62 da LOCE de melloras laborais do profesorado, artigo que contempla a proliferación de complementos salariais. Ademais, entende a administración educativa que a medida de equiparación que propoñemos, co aval de máis de 300 centros e case 4000 sinaturas, sería inoportuna toda vez que debe expirar o prazo de implantación do devandito acordo retributivo (Outubro/06).
Para finalizar, o STEG valorou como negativa en si a proliferación de complementos, pois provoca dinámicas xeradoras de reaccións en cadea, como o propio Canosa viña de explicar. Os representantes da administración educativa concordaron -aínda que vagamente- en que outorgar o nivel 24 ao corpo de mestres sería a medida da auténtica equiparación e dixeron que a nova titulación de Maxisterio quizá arranxe isto definitivamente.

GRACIAS A TODOS OS CENTROS E A TODAS AQUELAS MESTRAS E MESTRES QUE COLABORARON CON NÓS NESTA REIVINDICACIÓN

POLA NOSA PARTE SEGUIREMOS LOITANDO PARA QUE SE DIGNIFIQUE A PROFESIÓN DOCENTE NOS SEUS TRAMOS MÁIS INICIAIS E BÁSICOS.
OS NUMEROSOS APOIOS RECIBIDOS A PROL DESTA REIVINDICACIÓN, CONSIDERADA DE XUSTIZA POR TODA A COMUNIDADE EDUCATIVA, OBRÍGANNOS A FACER PÚBLICOS OS RESULTADOS ACADADOS, ASÍ COMO A TENTAR FACERNOS OUVIR NAS INSTANCIAS EDUCATIVAS E ANTE O VALEDOR DO POBO

Listado de centros que colaboraron na campaña.