Comunicado sobre o proceso de acordo arredor da xornada matinal en setembro e xuño

ANTECEDENTES.-
…A Consellaría de forma anticipada e non prevista presenta na Mesa Sectorial de Educación do 21 de marzo unha proposta de calendario escolar para o curso 2007-08, que suprime a xornada reducida en horario matinal e amplía o servizo de comedor aos meses de xuño e setembro.

…Nunha nova Mesa Sectorial, a Consellaría confirma a súa proposta de homoxeneizar a xornada durante todo o curso, concedendo unicamente retrasar o inicio de curso en 2 días. Todos os sindicatos anunciamos mobilizacións se se mantén esa proposta de calendario.

...O 16 de abril publícase en DOG a orde de Calendario, eliminando efectivamente a xornada reducida matinal nos meses de setembro e xuño e ampliando o servizo de comedor a eses meses. Esta medida afectaría sobre todo aos centros con xornadas partidas.

REACCIÓN SINDICAL.-
As organizacións sindicais coincidimos en que debe modificarse a orde de calendario garantindo a xornada matinal en xuño e setembro, pero as estratexias de acción son dispares, convocándose por separado diferentes accións: concentracións de delegados, resolucións das xuntas de persoal, recollida de sinaturas, envio de mails, entrevistas cos grupos parlamentarios, solicitude de entrevista coa Conselleira, etc., para acabar na convocatoria de folga do día 3 de maio. Desde o inicio deste proceso, o STEG traballou por acadar a unidade sindical, facendo de interlocutor con todos os sindicatos. Ante a imposibilidade de conseguir a unidade de acción, motivada polo profundo desencontro existente entre algúns sindicatos, o STEG decide estar en todas as convocatorias que se fagan contra esta medida.

REACCIÓN DA ADMINISTRACIÓN.-
Vendo o importante consenso contra a orde da Consellaría por parte do profesorado, así como o previsible apoio masivo ás mobilizacións propostas polos sindicatos (apoio manifestado desde moitas ANPAS e Direccións de Centros Educativos de Infantil e Primaria e CPIs), a Consellaría convoca o sábado 28 de abril aos sindicatos para propoñerlles un principio de acordo. Neste proceso de diálogo e inicio de negociación coa Consellaría participan todos os sindicatos xuntos (ANPE, CCOO, CSIF, FETE-UXT e STEG), pero non CIG que pide ver á conselleira en solitario, a pesares que tiña convocada a folga co STEG.

A 1ª PROPOSTA da Consellería é asinar un acordo nos seguintes termos:

o Estudo centro por centro da concesión da xornada matinal en xuño e setembro.
o Negociación duns novos catálogos no próximo curso
o Negociación da redución do horario do profesorado

Logo dun apurado proceso de negociación coa Consellaría ese mesmo sábado, e despois de que a Consellaría tamén se reunise coa CIG, os 5 sindicatos da plataforma aceptan un documento de PREACORDO nos seguintes termos:

o Concesión da xornada matinal, con carácter xeral, nos centros que o soliciten, previo acordo por maioría simple no Consello Escolar e sempre que fose posible para a organización do transporte.
o Negociación duns novos catálogos.
o Negociación da redución do horario do profesorado durante este curso para que sexa de aplicación no vindeiro curso.
o Negociación no 1º trimestre do curso 2007-2008 para flexibilizar/facilitar os requisitos que permiten aos centros establecer a xornada continuada de carácter permanente.

ACTUACIÓNS DO STEG.-
Este principio de acordo leva ao STEG a iniciar unha consulta urxente á afiliación e informala da marcha das negociacións. Reúnese extraordinariamente o Secretariado Nacional, ao tempo que se consulta a diversos centros educativos.

Ese mesmo luns 30 pola mañá e en rolda de prensa anunciamos que a nosa vontade era chegar a un acordo sobre a xornada matinal de xuño e setembro polo que asinamos o Pre-acordo, aínda que só ratificaríamos o acordo se a xornada matinal fose garantida para o 100% dos centros.

Durante esa mañá tivemos conversas co Secretario Xeral da Consellaría para forzar unha reunión esa mesma tarde á que tiveran oportunidade de asistir todos os sindicatos, noutro intento por conseguir a unidade sindical.

ACORDO.-
Iníciase a reunión ás 17:30 con todos os representantes sindicais excepto CIG (o STEG pregunta pola súa ausencia), desde a administración informan que os convocaron para as 16:30 pero que declinaron asistir. O STEG solicita revisar o preacordo no sentido de garantir a xornada matinal no 100% dos centros que o soliciten e condiciona a súa aceptación do acordo á modificación deste punto.

Despois de horas de reunión e varias pausas e consultas de todas as partes, a Consellaría atende a nosa primeira condición. As demais forzas sindicais coinciden no mesmo e a Administración entende que iso significa un importante paso, que era a principal esixencia da CIG, polo que, antes de asinar, propón comunicarllo a este sindicato e convidalo de novo a sumarse ao acordo. O STEG considera absolutamente necesario este xesto. A CIG é informada pola propia Administración das novidades, declinando acudir á sinatura do acordo.

LOGO DE ASINAR ESTE ACORDO O STEG DECIDE DESCONVOCAR A FOLGA DO DÍA 3 DE MAIO PORQUE SE CONSIGUE O OBXECTIVO MARCADO PREVIAMENTE NA CONVOCATORIA: A XORNADA MATINAL NOS MESES DE XUÑO E SETEMBRO.
AS RAZÓNS DO STEG:

1. Unha das razóns fundamentais era loitar pola extensión da xornada matinal en xuño e setembro ao 100% dos centros. Antes desta negociación e tras a publicación no DOG de 16 de abril da orde de calendario escolar, o que tiñamos era a sesión de tarde nos centros con xornada partida.

2. Despois de convocar a folga, a Consellaría accede á negociación, na que en último termo se consigue que todos os centros poidan manter a xornada matinal en xuño e setembro.

3. Neste acordo tamén se inclúe un punto oitavo que pon as bases para a extensión da xornada única naqueles centros que aínda non a teñen. Este tipo de xornada, acompañada de servizos complementarios e extraescolares é a máis conciliadora. No acordo asinado, a Consellaría comprométese a modificar o Decreto de Solicitude de Xornada Única.

4. ADEMAIS, ábrense procesos de negociación que poden mellorar substancialmente as condicións laborais do profesorado, reivindicacións históricas como a non coincidencia do horario lectivo do profesorado e do alumnado e a negociación de catálogos e postos de traballo.

5. Non acadamos todos os obxectivos, quedounos no camiño a redución da xornada lectiva anual do alumnado. Ista era innegociable a día de hoxe. Será un dos nosos obxectivos na negociación do próximo calendario escolar.

6. Criticamos duramente á Consellaría pola forma de abordar este importante tema: saltándose a Mesa Sectorial e publicando anticipada e inesperadamente a orde de calendario no DOG, chamando ao diálogo e negociación por separado ás forzas sindicais e facéndoo extemporaneamente: en fin de semana, ás 11 da noite e con absoluta presión temporal, a tres días vista dunha folga convocada e mobilizada por todas as forzas sindicais.

Por todo o exposto, e despois de recibir moitas opinións da afiliación e do profesorado, o STEG valorou que non había motivo suficiente para manter a folga, cando logramos que a Consellaría recúase e garantise a xornada matinal, ademais de avanzar na modificación da lexislación sobre xornada única, redución das horas de traballo e ampliación dos catálogos de persoal.

Aínda que desde o STEG se insistía no aumento da carga lectiva que para o alumnado supoñía o novo calendario os lemas da folga falaban de xornada continuada matinal e non de xornada reducida. Co acordo acadado o luns día 30 de abril entendemos que esta reivindicación estaba conseguida.

O STEG quere que coñezas os feitos e entendas a nosa postura. Pero temos o firme propósito de non entrar en descualificacións entre sindicatos, pois consideramos que –deste xeito- descalificámonos todos e descalificamos o sindicalismo do ensino, tan necesitado de unidade e de forza. Porque queda claro que quen debe protagonizar e rentabilizar este acordo non é este ou aquel sindicato, senón o conxunto do ensino público e da sociedade galega

Secretariado Nacional do STEG
maio 2007