Instrucións das Delegacións Provinciais sobre a modificación do calendario escolar

Nas instrucións remitidas aos centros escolares sobre a modificación do calendario escolar nos meses de xuño e setembro, o STEG quere mostrar o seu desacordo con dous puntos do mesmo.

1. No punto 2º establécese como data límite para a presentación da solicitude o 1 de xuño. Parécenos improcedente que despois de esperar máis de 20 días para facer estas instrucións, se deixe agora aos centros pouco máis de unha semana para levar a cabo todo o proceso.
2. Aínda que no punto 6º se di que a Delegación autorizará os horarios propostos polos centros, podendo facer as modificacións necesarias, no punto 4º dise que, con caracter xeral, a hora de entrada será a mesma que a fixada para o mes de setembro de 2006. Parece unha incongruencia que por un lado se acepte o horario proposto polo centro e por outro se estableza de antemán unha hora de entrada.

Desde o STEG xa lle temos solicitado por escrito, tanto a Secretaría Xeral como as Delegacións Provinciais que estes dous puntos sexan mudados nos seguintes termos:

1. que o prazo sexa ampliado ata o 8 de xuño.
2. que a hora de entrada en xuño e setembro non teña que ser a mesma que a que rexía en setembro do 2006. Se no vindeiro curso hai que contemplar unha hora lectiva máis, non parece o máis propicio que, con caracter xeral, esta se impoña a última hora da mañá.

De non facer caso á nosa solicitude, no que respecta ao horario de entrada, desde o STEG animamos a todos os centros que na súa solicitude fagan constar o horario que se decida no Consello Escolar, independentemente do que funcionara no curso 2006/2007.

Pregamos que calquera problema que poida xurdir a este respecto, nolo fagades saber para esixir a súa solución ante o Delegado Provincial ou ben, na comisión de seguimento do acordo, ante a Secretaría Xeral.

Secretariado Nacional do STEG
maio 2007