Sorpresivamente, con nocturnidade e alevosía, no tempo das primeiras lepiotas. Finais de Setembro. Sen previsións, sen información, desaparecen e non escoito nada. A finais de Setembro!
Que pasa co profesorado afectado, a estas alturas cando os destinos definitivos están adxudicados? Que pasa cos alumnos matriculados? Que pasa coas localidades onde estaban implantados e que da noite para o día son desprendidas desta oferta? Que pasará cos seus recursos, material, instrumentación, talleres..., totalmente fóra de control ao desaparecer do Centro o profesorado que os xestionaba? Que pasa cos alumnos con módulos pendentes?.
Perdoade por tanta pregunta, pero é que non me pára a cabeza. Finais de Setembro! Pero vou centrarme nunha pregunta e vou contextualizar o que vos quero dicir. A pregunta: Por que desaparecen? A contextualización: Son un profesor dun destes Ciclos suprimidos que foi informado que non tiña praza para este ano o 23 de Setembro ás dúas da tarde. Como vedes, son parte implicada.
Por que desaparecen e por que este silencio? A xustificación oficial é que non se matricularon alumnos abondo. E non se matriculou suficiente alumnado nun Ciclo que, nos anos que levo no Centro, nunca tivo problemas de matrícula: o ano pasado mesmo contamos con 20 alumnos. A miña resposta a esta pregunta é que hai moita xente interesada nisto. Vexamos:

1. Unha Administración cunha política claramente privatizadora de sectores públicos. Ao suprimir a oferta regrada da F.P. abre a porta á xestión privada de recursos e instalacións dos Centros Educativos a través da oferta en formación ocupacional, formación para adultos e máis cousas recollidas na nova lei de F.P. (LEI ORGÁNICA 5/2002 do 19 de xuño).
2. Centrais Sindicais interesadas e en predisposición de facerse con eses recursos e esas instalacións para impartir eses cursos de formación tan codiciados.
3. Os empresarios, que teñen -non esquezamos- como principal interese o diñeiro. Están no seu dereito, polo visto, pero non esquezamos que o noso interese é a formación integral e igualitaria de cidadáns. A eles interésalles máis a formación de traballadores abnegados e consumidores compulsivos. E serán eses os intereses atendidos cando nos Centros a F.P. regrada sexa sustituída por estes cursos de formación á carta, deseñados por empresas e impartidos por formadores privados. Por non falar da incorporación da formación ao negocio das empresas.
4. Directores dos Centros Educativos. Peza interesante de análise nesta engranaxe pois recae neles, moitas veces, a estratexia de acoso e derribo aos Ciclos Formativos. Unha figura, a do Director, cada vez máis alonxada do labor pedagóxico (penso na creación deste novo corpo de Directores de Centros Educativos) e máis próxima aos planeamentos empresariais. Directores con poder. Directores que manexan cartos, contratos, prebendas... Dá algo de medo o tema.

En fin, dixen ao principio que son parte interesada-perxudicada e así quero que se entenda. Pero tal como o vexo, imos camiño dunha formación profesional lixo para traballo precario, e de converter a F.P. nun negocio con cargo a fondos públicos.

Xis Costa
Profesor de Sistemas Electrónicos
IES Espiñeira. Boiro