Algúns datos para non ficar calado/a cando che falen de "Fracaso Escolar"

• Datos oficiais proporcionados polo Ministerio revelan que na última década (1989-1999) o fracaso escolar en España pasou do 37% ao 23%, reducíndose en máis do 13%.
  
  
• Organismos vencellados á OCDE coinciden en sinalar que o nivel educativo español mellorou no período sinalado, atendendo a diversos indicadores e estudios que así o poñen de manifesto.
  
  
• Álvaro Marchesi, pola súa banda, presentou resultados de investigacións en base a enquisas á poboación escolar que sinalan a confianza do alumnado de Garantía Social en conseguir traballo a través do programa, indican igualmente o pouco éxito e utilidade das repeticións de curso, amosan tamén un aceptable grao de satisfacción coas cualificacións por parte do alumnado, advirten do feito de que canto máis se atrasa a decisión sobre o que o alumno quere escoller, maiores éxitos se conseguen, a diferencia do estipulado polas normas españolas.
  
  
• Finalmente, moitos estudios neste mesmo camiño ven a importancia da prevención e de unha organización en ESO máis flexible, onde sexa doado cambiar de opción, así como dar máis apoio aos centros escolares con alumnado de maior risco ante o fracaso.
  
  
• Galiza estaría, por outra banda e segundo estes mesmos estudios, entre as 3 comunidades do Estado español con mellor nivel educativo ao manter un 17% de fracaso.
  
  
• Reiteradamente se informa, desde estes medios, de que se debe ter en conta que a transición cara o mundo laboral por parte dos españois é bastante peor que a media europea, xa que a proporción de xuventude desempregada é 2'5 veces superior á establecida pola OCDE.
  
  
• A xuventude española tarda de media uns 5 anos máis que a da UE en atopar un traballo estable.
  
  
• Así pois, o fracaso escolar estaría relacionado -segundo algunhas conclusións dos estudios referidos- coa posibilidade certa e ilusionante para a xente nova de poderen traballar segundo rematan a etapa escolar, situación esta que non se corresponde co actual mercado español, onde o número de contratos de aprendices só acada o 2%, mentres que en Austria chega ao 40% e en Suíza é do 70%.

Francisco Legaspi

Imprimir esta páxina